Kanosi pronarin e lokalit dhe goditi me grusht policin, arrestohet 37-vjeçari

Një 37-vjeçar është arrestuar në Rubik, Mirditë, pasi kanosi me mjet prerës (thikë) pronarin e një lokali për motive të dobëta dhe më pas kundërshtoi me forcë punonjësit e Policisë që ndërhynë për parandalimin e përshkallëzimit të situatës.

Shërbimet e Policisë, pas marrjes së informacionit për ngjarjen, kanë shkuar menjëherë në vendngjarje për të neutralizuar situatën. Gjatë ndërhyrjes, shtetasi L. D., i cili ishte në gjendje të dehur, ka goditur me grusht një punonjës të policisë dhe ka tentuar të largohet me vrap.

Pas një operacioni të shpejtë kontrolli, ai u kap dhe u arrestua. Gjatë kontrollit, u gjetën dhe u sekuestruan dy mjete prerëse (thika), të cilat ishin në pronësi të tij.

Materialet procedurale për veprat penale “Kanosja”, “Prodhimi, mbajtja, blerja apo shitja e armëve të ftohta”, “Goditja për shkak të detyrës” dhe “Kundërshtimi i punonjësit të policisë së rendit publik” i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë.

LEXONI GJITHASHTU:

• Kanosi me mesazheve efektivin, pranga 19-vjeçarit në Lezhë
• Murtaja Afrikane/ Ministria e Bujqësisë njoftim për fermerët: Kemi raste në Lezhë