Kaosi në Kuvend, Sekretariati i Etikës vendos sot për fatin e 29 deputetëve të PD-së

Sekretariati i Etikës mblidhet sot në orën 10:00 për të shqyrtuar kërkesën e Partisë Socialiste për përjashtimin e 29 deputetëve të opozitës, të përfshirë në incidentet e ndodhura gjatë seancës plenare të Kuvendit më 18 dhjetor.

Mbledhja e mëparshme u shty, pasi deputetët e opozitës kërkuan kohë për t’u njohur me provat e administruara ndaj tyre. Ndërkohë, mazhoranca i ka kërkuar Prokurorisë të vlerësojë nisjen e një hetimi penal ndaj Flamur Nokës dhe Klevis Balliut, për përplasjet fizike me punonjësit e Gardës së Republikës.

Sipas PS-së, aktet e dhunës në Kuvend ishin të mirëorganizuara dhe të orkestruara nga drejtuesit e Partisë Demokratike, duke përmendur si përgjegjës kryetarin Sali Berisha, si edhe deputetët Flamur Noka dhe Gazmend Bardhi.

Mazhoranca kërkon përjashtim 60-ditor nga punimet e Kuvendit për Flamur Nokën dhe Klevis Balliun, të përfshirë drejtpërdrejt në përplasjet me Gardën, si dhe për Sali Berishën dhe Gazmend Bardhin, të cilët akuzohen si organizatorë të dhunës. Në të njëjtën masë disiplinore përfshihen edhe deputetët që ndezën mjete tymuese në sallën plenare: Belind Këlliçi, Fidel Kreka, Albana Vokshi, Ledina Alolli dhe Denisa Vata.

Ndërkaq, për 19 deputetë të tjerë, të cilët rrethuan foltoren gjatë seancës, PS kërkon përjashtim 10-ditor nga punimet parlamentare.

LEXONI GJITHASHTU: 

• Kaosi në parlament, përjashtohen Klevis Balliu dhe Flamur Noka
• Shabani betohet si Avokat i Popullit mes kaosit, çfarë ndodhi në seancën plenare