Kapet me 600 mijë euro kokainë në makinë, arrestohet shqiptari në Itali

Guardia di Finanza në Firence ka arrestuar një shtetas shqiptar 33-vjeçar, i cili u kap me një sasi të konsiderueshme droge dhe para të thata.

Arrestimi u realizua pas një kontrolli të detajuar, pasi autoritetet kishin vërejtur lëvizje të dyshimta me automjetin e tij. Gjatë inspektimit, në makinën e tij u gjetën mbi 15 kilogramë kokainë, të ndarë në 20 blloqe, dhe 12 kilogramë marijuanë. Përveç drogës, u sekuestruan edhe 37 mijë euro cash.

Vlera e drogës në treg, nëse do të hidhej, kapte shumën e 600 mijë eurove.

Autoritetet konfiskuan gjithashtu pajisje të specializuara për paketimin dhe shpërndarjen e drogës, përfshirë një makinë ambalazhuese me vakum, peshore precize, prerëse dhe materiale të tjera ambalazhimi.

Hetimet vazhdojnë për të zbuluar nëse ky arrestim është pjesë e një rrjeti më të gjerë trafikimi dhe për të identifikuar mundësitë e lidhjeve me grupe të tjera kriminale, si në Itali, ashtu edhe jashtë saj.