Kapet në Fier i kërkuari ndërkombëtarisht për trafikim droge (EMRI)

Në kuadër të operacionit ndërkombëtar “Fingerprint”, policia ka arrestuar në Fier shtetasin Edi Hoxha, 41 vjeç, i cili dyshohet si një nga koordinuesit kryesorë të një organizate kriminale që trafikonte drogë në Shqipëri, Itali dhe Zvicër.

Operacioni “Fingerprint” është rezultat i një bashkëpunimi disa mujor mes Policisë së Shtetit në Shqipëri, Drejtorisë së Qarkut Antimafia Compagnia Carabinieri në Borgo San Lorenzo, Firenze dhe Zyrës së Sigurisë së Ambasadës së Italisë në Shqipëri.

Gjatë këtij operacioni, që u zhvillua në të dyja vendet, u ekzekutuan 10 nga 12 urdhër-arreste të lëshuara nga Gjykata e Firenzes, ndërsa dy persona të tjerë janë ende në kërkim. Edi Hoxha, i cili u arrestua në Fier, është i shpallur në kërkim ndërkombëtar për trafikim të lëndëve narkotike, me masën e sigurisë “Arrest në burg” të vendosur nga autoritetet italiane.

Sipas hetimeve, gjatë periudhës 2020-2021, Hoxha ka koordinuar aktivitetin kriminal të organizatës për trafikun e kokainës dhe cannabis sativa, ndërsa tani pritet ekstradimi i tij drejt Italisë për t’u përballur me drejtësinë.

Interpol Tirana dhe Interpol Roma po vijojnë bashkëpunimin për finalizimin e procedurave të ekstradimit.

LEXONI GJITHASHTU:

• Dhunuan kushëririn e tyre dhe i dëmtuan mjetin, arrestohen dy persona në Fier
• Aksident në aksin Fier–Patos, plagosen dy persona