Kapi rekordet më të ulëta historike, euro rritet pas fushatës elektorale

Monedha europiane po kthehet në kursin e rritjes, pasi preku nivelet historike të zhvlerësimit përballë lekut. Ajo po fiton pikë dita-ditës dhe këtë mesjavë këmbehet 112.8 lekë

Euro po rritet në kursin e këmbimit me lekun. Sipas kursit zyrtar të Bankës së Shqipërisë, monedha europiane u këmbye me 112.8 lekë të mërkurën, me rritje 1.5 pikë krahasuar me ditën e hënë.

Ringritja e shpejtë e euros në kursin e këmbimit valutor po ndjek një trajektore të ngjashme me fundin e vitit të kaluar. Agjentet në treg thonë se një arsye që shpjegon këtë rritje ka qenë krijimi i pritshmërive se euro do të rritej sërish pas zgjedhjeve.

Kjo mendohet se solli një kërkesë të lartë për të blerë euro, megjithatë, prirjet afatgjata të kursit ngelen dukshëm në favor të lekut, që rezulton të jetë mbiçmuar me 7.2% kundrejt euros krahasuar me të njëjtën periudhë të një viti më parë.

Ringritja e euros në kursin e këmbimit ndihmon bizneset eksportuese dhe ato subjekte që marrin të ardhura në valutë dhe kryejnë shpenzime në lekë.

Nga ana tjetër, operatorët dyshojnë që euro të ngrihet në nivelet e vitit 2021, pasi turizmi po bëhet një faktor me ndikim gjithnjë e më të rëndësishëm në bilancin e pagesave dhe si rrjedhojë edhe në kursin e këmbimit valutor.

LEXO GJITHASHTU:

• Berisha: Zgjedhjet u blenë, 1 votë kapte shifra nga 300 në 500 euro
• Cilat janë bashkitë që u humbën nga përçarja e PD-së