Cilat janë bashkitë që u humbën nga përçarja e PD-së

Lufta brenda llojit ka sjellë pasojat e saj edhe në këto zgjedhje për opozitën. Janë 4 bashki që mund të ishin fituar nëse Partia Demokratike do të ishte e bashkuar.

Në bashkinë e Kuçovës, 783 votat që mori Ilir Koxhaj i Partisë Demokratike, i kushtuan mandatin e kryebashkiakut Lefer Maliqit të koalicionit Bashkë Fitojmë.

Po ashtu edhe në Bashkinë Finiq nëse Partia Demokratike do të dilte e bashkuar në këto zgjedhje, do të kishte fituar 61.42% të votave, kundrejt kandidatit të partisë MEGA.

Në bashkinë Këlcyrë, 137 votat e Adriatik Spahiut, i hoqën fitoren nga duart kandidatit të koalicionit “Bashkë Fitojmë” Arjan Kasaj, vota këto që nëse PD do të ishte e bashkuar, do të bënin 50.66% të totalit, të mjaftueshme për të fituar.

Bashkia e katërt ku përçarja e opozitës favorizoi mazhorancën socialiste është Bashkia Mallakaster, ku Agron Kapllanaj humbi me 290 vota përballë socialistit Qerim Ismaili, ndërsa kandidati i Koalicionit “Bashkë Fitojmë” arriti të merrte 735 vota, të mjaftueshmë për të bërë 51.76% nëse do të ishin bashkë, për të mos ja dhuruar edhe këtë bashki Partisë Socialiste.

LEXO GJITHASHTU:

• Kapi rekordet më të ulëta historike, euro rritet pas fushatës elektorale
• Berisha: Zgjedhjet u blenë, 1 votë kapte shifra nga 300 në 500 euro