KAS rrëzon kërkesën e Gjergj Nikës për t’u regjistruar kandidat i pavarur në Vlorë

Komisioni i Ankesave dhe Sanksioneve, i mbledhur mbrëmjen e së dielës, ka rrëzuar kërkesën e Gjergj Nikës për t’u regjistruar si kandidat i pavarur për bashkinë e Vlorës.

Në vendimin e arsyetuar, anëtarët e KAS theksuan se, megjithëse Nika gëzon mandatin e këshilltarit bashkiak të Vlorës, ai duhej të kishte regjistruar një Komitet Nismëtar, në përputhje me kërkesat ligjore për kandidatët e propozuar nga zgjedhësit.

Sipas  KQZ, ligji shqiptar nuk njeh vetëshpalljen si kandidat të pavarur, duke e bërë të detyrueshëm ngritjen e Komitetit Nismëtar. Megjithatë, për shkak të mandatit si këshilltar, Nikës nuk do t’i ishte dashur të mblidhte firmat e 1% të zgjedhësve të bashkisë Vlorë.

Më herët, Komisioneri Shtetëror i Zgjedhjeve, Ilirjan Celibashi, kishte refuzuar regjistrimin e tij në shkallën e parë administrative, vendim që tani është konfirmuar nga KAS.