Kastriot Islami: Pse u ndryshua sistemi zgjedhor në 2008

Ish-deputeti Kastriot Islami shpjegoi në emisionin ‘Me pak fjalë’ për Neritan Sejaminin se cilat ishin arsyet që në vitin 2008 detyruan partitë që të ndryshonin sistemin zgjedhor. Islami, pjesë e ekipit kryesor të ndryshimeve të sistemit elektoral, shpjegoi se pas një analize gjithëpërfshirëse të sistemit mazhoritar, u pa e nevojshme ndryshimi i tij.

Sipas Islamit, tre ishin problemet kryesore të sistemit mazhoritar, përdorur deri në zgjedhjet e vitit 2005:

• Sistemi kishte filluar të delegjitimohej;
• Partitë e vogla kishin rol dispropocional me votat e tyre;
• Kandidimi i personave me profil apolitik po shtohej shumë, veçanërisht të atyre me rekorde kriminale.

Për të shmangur këto dukuri, sipas Islamit nevojitej të ndryshohej gjithë sistemi dhe jo vetëm të bëheshin ndërhyrje brenda sistemit mazhoritar të asaj kohe. Pyetur nga Sejamini se cilat ishin interesat e liderëve të partive kryesore në vitin 2008, Islami u shpreh: “Të shmangej fenomeni i ‘Dushkut’, të shmangej ‘diktatura’ e partive të vogla dhe të shmangeshin oligarkët.”

Ai shpjegoi se përzgjedhja e sistemit proporcional u bë në dakordësi të të dyja partive kryesore, asaj Demokratike dhe Socialiste. Duke parë zhvillimet e sotme politike, Kastrioti tha se nëse dy problemet e para mund të jenë zbehur, problemi i tretë, prania e oligarkëve në politikë është ende i pranishëm dhe sistemi proporcional nuk mundi ta largojë atë.