Këmbim valutor pa licencë, arrestohet 49-vjeçarja në Tiranë

Policia e Tiranës ka arrestuar një 49-vjeçare me inicialet G.T., administratore e një subjekti, nën dyshimet se ushtronte aktivitetin e këmbimit valutor pa licencë dhe fshihte të ardhurat e përfituara.

Sipas njoftimit të policisë, gjatë kontrollit janë sekuestruar rreth 40,000 euro në valuta të ndryshme dhe një njësi kompjuterike, nga e cila rezulton se subjekti ka qarkulluar rreth 2,000,000 euro.

“Nga kontrolli i organizuar në kuadër të operacionit ‘Bilanci’ në subjektin në administrim të shtetases G.T., rezultoi se kjo shtetase ushtronte aktivitetin e këmbimit valutor pa licencën përkatëse dhe nuk deklaronte të ardhurat e përfituara nga ky aktivitet. Në përfundim të veprimeve procedurale, u bë arrestimi në flagrancë i shtetases G.T., 49 vjeçe, banuese në Tiranë”, njofton policia.

Materialet procedurale janë referuar Prokurorisë për veprime të mëtejshme.