Kërcënon sërish Putin: Do furnizojmë me raketa me rreze të gjatë armiqtë e NATO

“Rusia mund t’u dërgojë armë kundërshtarëve të Perëndimit”, ka paralajmëruar për herë të dytë Vladimir Putin.

Presidenti rus përsëriti paralajmërimin e bërë në fillim të kësaj jave, gjatë Forumit Ekonomik të Shën Petersburgut.

Ai nuk tha se cilave shtete apo subjekte u referohej dhe theksoi se Moska nuk po e bën këtë gjë aktualisht.

“Nëse ata furnizojnë (armë) në zonën e luftimit dhe bëjnë thirrje për përdorimin e këtyre armëve kundër territorit tonë, pse ne nuk kemi të drejtë të bëjmë të njëjtën gjë?” u tha ai të pranishmëve.

“Por unë nuk jam gati të them se ne do ta bëjmë atë nesër.”

Të mërkurën, Putin u tha gazetarëve ndërkombëtarë se Rusia mund të sigurojë armë me rreze të gjatë për vendet që duan të godasin objektivat perëndimore, në përgjigje të aleatëve të NATO-s që lejojnë Ukrainën të përdorë armët e tyre për të sulmuar territorin rus.

Ai ripohoi gjithashtu gatishmërinë e Moskës për të përdorur armë bërthamore nëse sheh një kërcënim për sovranitetin e saj.

Megjithatë lideri rus theksoi se aktualisht nuk i sheh kushtet për përdorimin e armëve bërthamore siç përcaktohen në doktrinën bërthamore të Rusisë – por shtoi se nuk mund të përjashtojë një ndryshim të doktrinës.

“Ne kemi një doktrinë bërthamore që thotë se përdorimi i armëve bërthamore është i mundur në një rast të jashtëzakonshëm, kur sovraniteti dhe integriteti territorial i vendit tonë kërcënohet,” tha ai në Forumin Ekonomik Ndërkombëtar të Shën Petersburgut.

“Por doktrina mund të ndryshohet. E njëjta gjë vlen edhe për testet bërthamore. Ne do të kryejmë teste nëse është e nevojshme, por deri më tani nuk ka një nevojë të tillë”, tha ai.

LEXONI GJITHASHTU:

• “Përgjigje asimetrike Perëndimit”- Kërcënon Putin: Do armatosim rivalët e NATO-s
• Putin: Rusia mund të përdorë armët bërthamore nëse kërcënohet