Kërkojnë zbutje të masës së sigurisë, Apeli i GJKKO vendos për Metën dhe Kryemadhin

Në Apelin e GJKKO-së pritet të nisë seancë për kreun e Partisë së Lirisë, Ilir Meta dhe deputeten Monika Kryemadhin, të cilët kanë ankimuar masat e sigurisë.

Ish presidenti është në masën e sigurisë ‘arrest me burg’, ndërsa ish-bashkëshortja e tij e masën me ‘detyrim paraqitje’.

Kryemadhi është nën hetim për akuzat e korrupsionit, pastrimit të parave dhe fshehjes së pasurisë, dhe ka masën e sigurisë “detyrim paraqitje”. Ndërkohë, ish-Presidenti Ilir Meta, aktualisht kryetar i Partisë së Lirisë, ndodhet në burg për të njëjtat akuza.

Prokuroria e Posaçme ka ngritur akuza ndaj tij për tre raste korrupsioni, përfshirë çështjen e njohur si CEZ-DIA, për përfitime monetare në këmbim të ndikimit të ushtruar për një kompani, si dhe për lidhjet e dyshuara korruptive me një biznesmen, për të cilin ka ndërhyrë në ndryshimin e një ligji në Kuvendin e Shqipërisë.

Pavarësisht akuzave, të dy, Kryemadhi dhe Meta, i mohojnë ato dhe i konsiderojnë hetimet si një përpjekje politike për të sulmuar opozitën.

LEXONI GJITHASHTU:

• Kikia: Meta është një nga mëkatarët e mëdhenj të vendit
• Pse nuk pranon ta takojë në burg Monika Kryemadhin, përgjigjet Meta