KFOR: Kemi rreth 25 ushtarë të plagosur në veri të Kosovës

Të paktën 25 ushtarë të misionit paqeruajtës të NATO-s në Kosovë, KFOR, kanë mbetur të plagosur si pasojë e përleshjeve me qytetarët serbë në komunën e Zveçanit në veri të Kosovës, bëri të ditur misioni përmes një njoftimi për media.

“Duke iu kundërvënë turmës, disa ushtarë të kontingjentit italian dhe hungarez të KFOR-it ishin objekt i sulmeve të paprovokuara dhe plagëve të marra trauma me thyerje dhe djegie nga shpërthimi i mjeteve ndezëse”, thuhet në njoftim.

Sipas KFOR-it, ushtarët janë trajtuar me kohë nga njësitë mjekësore dhe aktualisht janë nën vëzhgim nga personeli mjekësor i cili po vlerëson gjendjen e tyre.

Ata bënë të ditur se pasditen e së hënës, njësitet e KFOR-it janë dërguar në 4 komunat e veriut të Kosovës “për të frenuar demonstratat e dhunshme të ndodhura pasi kryetarët e sapozgjedhur ditëve të fundit tentuan të marrin detyrën”.

Nga KFOR-i thanë se komandanti i misionit, gjenerali i divizionit Angelo Michele Ristuccia, personalisht po e përcjell zhvillimin e situatës.

#KFOR statement pic.twitter.com/kfYybyqC2G

— NATO Kosovo Force – KFOR (@NATO_KFOR) May 29, 2023

Edhe Aleanca Ushtarake e NATO-s dënoi sulmet kundër trupave të KFOR-it në veri të Kosovës.

Përmes një deklarate, Aleanca tha se “sulme të tilla janë krejtësisht të papranueshme”.

LEXONI GJITHASHTU:

• Ambasadori i BE-së në Kosovë: Dënojmë veprimet e dhunshme të protestuesve
• Tensionet në Veri, analisti amerikan: Kurti fajtor, por jo sa Vuçiç