Kievi falënderon Elon Musk për bllokimin e Starlink në Rusi: Masat po japin rezultate

Ministri ukrainas i Mbrojtjes, Mykhailo Fedorov falënderoi këtë të diele Elon Musk dhe kompaninë e tij SpaceX për marrjen e masave për të parandaluar Rusinë të përdorë sistemet e saj të komunikimit satelitor Starlink për të dërguar dronë mbi Ukrainë.

“Masat e para tashmë po japin rezultate. Faleminderit që jeni me ne. Ju jeni një kampion i vërtetë i lirisë dhe një mik i vërtetë i popullit ukrainas”, tha Ministri në platformën X, duke iu drejtuar Elon Musk.

Fedorov sqaroi se Kievi po punon në bashkëpunim shumë të ngushtë me SpaceX për masa të rëndësishme në të ardhmen e afërt. Ai sqaroi se këto masa përfshijnë zbatimin e një sistemi regjistrimi për terminalet e Starlink që operojnë nga territori ukrainas.

“Në ditët në vijim, ne do t’u komunikojmë përdoruesve ukrainas udhëzimet e nevojshme për të regjistruar dhe konfirmuar stacionet e tyre Starlink. Stacionet e pakonfirmuara do të çaktivizohen”, tha ai.

Të enjten, Fedorov njoftoi se Kievi kishte kontaktuar SpaceX pas shfaqjes së dronëve rusë të pajisur me lidhje Starlink mbi qytetet ukrainase dhe se kishte kërkuar zgjidhje me ekipet e Elon Musk.

Që nga fundi i dhjetorit, Instituti për Studimin e Luftës, një grup ekspertësh amerikanë, ka regjistruar integrimin e sistemeve Starlink në dronë sulmues rusë, duke rritur rrezen e tyre në 500 kilometra.

Sipas inteligjencës ukrainase, ushtria ruse i bleu stacionet Starlink përmes kanaleve paralele, siç janë importet nga vendet e treta, në vend që të shitej zyrtarisht nga kompania e Elon Musk.

Një ndërprerje e përgjithshme e sistemit Starlink në Ukrainë do të ndërlikohej nga fakti se ai përdoret masivisht edhe nga ushtria ukrainase për komunikimet e saj.

Fedorov tha të enjten se vendimi i Elon Musk për të aktivizuar urgjentisht Starlink dhe për të dërguar grupin e parë të stacioneve në Ukrainë në fillim të një pushtimi në shkallë të gjerë ishte thelbësor për qëndrueshmërinë” e Ukrainës.