Kievi: Rusia ndërmerr sulmin më të madh me dronë kundër Ukrainës

Presidenti i Ukrainës, Volodymyr Zelenskiy, tha të dielën se Rusia përdori më shumë se 200 dronë në një sulm gjatë natës, më i madhi gjatë luftës, ndërsa dënoi “terrorin ajror” të Rusisë dhe bëri thirrje për unitet mes aleatëve të Ukrainës.

“Çdo ditë, njerëzit tanë u rezistojnë terrorit ajror”, tha ai përmes një postimi në rrjetin X.

“Në prag të përvjetorit të tretë të luftës në shkallë të gjerë, Rusia lëshoi 267 dronë kundër Ukrainës, sulmi më i madh që kur dronët iranianë filluan të godisnin qytetet dhe fshatrat e Ukrainës”, thuhet në deklaratën e Presidentit Zelenskiy.

Forcat ajrore të Ukrainës thanë përmes një deklarate se 138 dronë u rrëzuan nga sistemet e mbrojtjes ajrore dhe 119 të tjerë u zhdukën nga radarët pasi u neutralizuan me pajisje luftarake elektronike, duke shtuar se Rusia lëshoi gjithashtu tre raketa balistike. Dëme nga ky sulm u raportuan në pesë rajone të Ukrainës.

Moska ka kryer sulme masive me dronë ndaj Ukrainës pothuajse çdo natë për muaj të tërë, duke u përpjekur të dobësojë mbrojtjen ajrore të Kievit.

Presidenti Zelenskiy tha se rreth 1,150 dronë, më shumë se 1,400 bomba dhe 35 raketa të llojeve të ndryshme, u lëshuan gjithsej nga Rusia në drejtim të Ukrainës gjatë javës së kaluar.

Presidenti Zelenskiy falënderoi forcat ajrore të Ukrainës dhe u bëri thirrje aleatëve të vendit që të ruajnë unitetin në përpjekjet për të siguruar një “paqe të drejtë dhe të qëndrueshme”.

Kievi dhe aleatët e tij evropianë kanë shprehur shqetësimin e tyre për sulmet e Presidentit amerikan Donald Trump ndaj Presidentit Zelenskiy javën e kaluar dhe për një takim midis delegacioneve amerikane dhe ruse në Riad, në të cilin Ukraina nuk ishte ftuar.