Kina dhe India neutrale ndaj Rusisë, abstenojnë rezolutën e OKB-së

Rusia përdori të drejtën e vetos për të bllokuar një rezolutë të Këshillit të Sigurimit që “dënon” pushtimin rus në Ukrainë. Vetoja e Moskës ishte e pritshme, por Kina dhe India absetuan.

Teksti i rezolutës kërkonte tërheqjen e trupave ruse nga Ukraina. Edhe Shqipëria kishte kërkuar që kjo rezolutë të votohej.

“Të mos harrojmë kurrë se kjo është një luftë e zgjedhur. Zgjedhja e Rusisë. Rusia zgjodhi të pushtojë fqinjin e saj”, u shpreh Linda Thomas-Greenfield, ambasadore e SHBA në Kombet e Bashkuara.

Sekretari i Përgjithshëm i OKB-së dënoi agresionin e Rusisë duke bërë thirrje për dialog

“Kombet e Bashkuara lindën nga lufta për t’i dhënë fund luftës. Sot, ai objektiv nuk u arrit. Por ne nuk duhet të dorëzohemi kurrë. Ne duhet t’i japim paqes një shans tjetër. Ushtarët duhet të kthehen në bazat  e tyre. Udhëheqësit duhet t’i kthehen rrugës se dialogut dhe paqes”, u shpreh Antonio Guterres, Sekretar i Përgjithshëm i OKB-së.

Shumica e anëtarëve të Këshillit të Sigurimit të OKB-së mbanin flamurin ukrainas përballë pikturës së Pikasos e konsideruar një nga veprat më të fuqishme kundër luftës në histori.