Kina refuzon të dënojë sulmin rus ndaj Ukrainës

Kina ka refuzuar të dënojë sulmin e Rusisë ndaj Ukrainës të enjten, e në vend të kësaj ka akuzuar Shtetet e Bashkuara se “kanë ushqyer zjarrin” për të përkeqësuar tensionet.

Në një konferencë 90-minutëshe, zëdhënësja Punëve të Jashtme Hua Chunying shmangu më shumë se 11 pyetje në lidhje me veprimet e Rusisë në Ukrainë, raporton CNN.

Hua shtoi se Kina do të fillojë importimin e grurit rus, një veprim që mund të lehtësojë ndikimin e sanksioneve perëndimore ndaj Rusisë.

“Çështja e Ukrainës ka një sfond historik shumë të ndërlikuar. Ajo ka evoluar në situatën aktuale për shkak të veprimit të përbashkët të faktorëve të ndryshëm. Siguria duhet të jetë çështje e bashkëpunimit të përbashkët dhe sigurisë së qëndrueshme, dhe shqetësimet legjitime të sigurisë të të gjitha palëve duhet të respektohen dhe të adresohen”, u shpreh Hua gjatë konferencës.

Kina “po ndjek nga afër situatën e fundit” dhe u bën thirrje palëve “të kenë përmbajtje për të shmangur daljen e situatës jashtë kontrollit”, përsëriti Hua disa herë gjatë konferencës.

Të enjten, administrata doganore e Kinës deklaroi se do të lejojë importet e grurit nga Rusia duke filluar nga 24 shkurti.

Të dy vendet njoftuan një marrëveshje në fillim të këtij muaji, që e lejonte Kinën të importonte grurë rus.

Megjithëse nuk janë aleatë ushtarakë, Kina dhe Rusia kanë paraqitur një front gjithnjë e më të bashkuar përballë asaj që ata e shohin si ndërhyrje perëndimore në punët dhe rajonet e tyre.