Kishin ardhur nga Londra të shisnin drogëra të forta në Dhërmi, e ‘pësojnë’ turistët

Dy turistë nga Anglia janë arrestuar nga policia e Himarës, pasi kryenin shpërndarje të drogërave të forta gjatë sezonit turistik në Dhërmi.

Gjatë kontrollit fizik dhe atij të ambienteve ku këta shtetas ishin akomoduar, shërbimet e Policisë gjetën një sasi lëndë narkotike të llojit GHB (Gamma- hydroxybutyrate), të ndarë në 37 doza, të cilat u sekuestruan në cilësinë e provës materiale, së bashku me 2 aparate celulare.

Nga veprimet hetimore dyshohet se këta 2 shtetas kishin ardhur si turistë nga Anglia në Dhërmi, dhe në bashkëpunim me njëri-tjetrin, shpërndanin lëndë narkotike në doza, në këtë zonë bregdetare, kryesisht për turistët e tjerë, në lokalet e natës dhe në aktivitetet e ndryshme të argëtimit që zhvillohen në bregdet, gjatë sezonit turistik.

Materialet procedurale në ngarkim të tyre i kaluan Prokurorisë, për veprime të mëtejshme.

“Seksioni i Trafiqeve të Paligjshme dhe Narkotikëve në DVP Vlorë, në bashkëpunim me shërbimet e Komisariatit të Policisë Himarë, në vijim të operacioneve të njëpasnjëshme me fokus parandalimin, evidentimin dhe goditjen e veprimtarive kriminale në fushën e narkotikëve, bazuar dhe në informacionet e siguruara nga inteligjenca informative se disa shtetas të huaj të ardhur si turistë në zonën bregdetare të Dhërmiut, kryenin veprimtarinë kriminale të shpërndarjes së drogave të forta, kanë organizuar dhe finalizuar operacionin policor të koduar “Parts 6”, si rezultat i të cilit u arrestuan në flagrancë shtetasit anglez:  G. S., 38 vjeç dhe R. B., 28 vjeç, të dy banues në Londër”, njofton policia.

LEXONI GJITHASHTU:

• SPAK heton tenderin 1 mln euro të mushkonjave, pas Binos, 4 zyrtarë merren në pyetje
• Qëlloi me çekiç pronarin e lokalit dhe i theu xhamat, arrestohet 27-vjeçari