Kishte ndërtuar bunker nëntokë, arrestohet bosi më i kërkuar i drogës në Ekuador

Krimineli më i kërkuar në Ekuador, Adolfo Macías Villamar, i njohur ndryshe me pseudonimin “Fito”, është arrestuar nga autoritetet ekuadoriane pas një operacioni të gjerë policor dhe ushtarak në qytetin bregdetar të Mantës. Ai konsiderohej personi më i kërkuar në vend pas arratisjes nga burgu në janar të këtij viti.

Macías, lider i bandës famëkeqe Los Choneros, u lokalizua në një bunker të ndërtuar nëntokë, nën një vilë luksoze në lagjen Monterrey. “Streha” e tij ishte e pajisur me krevat, ajër të kondicionuar, frigorifer dhe sistem ventilimi. Në katet e sipërme të banesës ndodheshin ambiente relaksi, si një palestër dhe një dhomë lojërash.

Operacioni zgjati rreth 10 orë dhe sipas autoriteteve u zhvillua pa shkëmbim zjarri. Menjëherë pas arrestimit, Fito u transferua në qytetin portual të Guayaquil, ku ndodhen burgjet e sigurisë së lartë të vendit. Ai u dërgua në burgun famëkeq La Roca, prej nga ishte arratisur më herët me ndihmën e rojeve të korruptuar.

Adolfo Macías po përballet me akuza të rënda për trafik ndërkombëtar droge, vrasje dhe organizatë kriminale. Ai është gjithashtu i dyshuar për urdhërimin e vrasjes së kandidatit presidencial Fernando Villavicencio në vitin 2023.

Presidenti i Ekuadorit, Daniel Noboa, përgëzoi forcat e rendit për operacionin dhe konfirmoi se Macías do të ekstradohet në Shtetet e Bashkuara, ku përballet me akuza për trafik kokaine.

“Më shumë bosë droge do të bien. Ne do ta rimarrim kontrollin e vendit,” shkroi Noboa në rrjetin X.

Arratisja e Fitos ishte një nga ngjarjet më të rënda të sigurisë së brendshme në Ekuador vitet e fundit, duke nxitur trazira të dhunshme në burgje dhe shpalljen e gjendjes së jashtëzakonshme nga autoritetet. Arrestimi i tij shënon një zhvillim të rëndësishëm në përpjekjet e shtetit për të rikthyer rendin dhe për të frenuar ndikimin e bandave kriminale.

LEXONI GJITHASHTU:

• Arratisja nga burgu i Shënkollit, detaje nga hetimet/ Çfarë kapën kamerat e sigurisë
• “Të merren në mbrojtje familjarët”, psikologia: I arratisuri beson se ata i kanë…