Tre ndeshje të javës së 29-të në Kategorinë Superiore Shqiptare nuk prodhuan fitues, duke u mbyllur në barazime.

Dy prej tyre, Tirana-Vllaznia dhe Teuta-Elbasani, përfunduan pa gola, ndërsa Egnatia u ndal në transfertë ndaj Laçit me rezultatin 1-1.

Në “Elbasan Arena”, Tirana dhe Vllaznia luajtën një “klasike” të ngjashme me një lojë të tensionuar, por pa arritur të shënojnë.

Pavarësisht rasteve të shumta, asnjë skuadër nuk arriti të merrte 3 pikët. Tirana gjeti dy herë rrugën e rrjetës, përmes Jarmouni dhe Ernest, por të dy golat u anuluan për pozicion jashtë loje.

Pas këtij barazimi, Vllaznia mbetet në vendin e tretë me 50 pikë, po aq sa Dinamo, ndërsa Tirana, me 30 pikë, renditet e 8-ta.

Një tjetër ndeshje pa gola u zhvillua mes Teutës dhe Elbasanit, në “Niko Dovana” të Durrësit. Pavarësisht rasteve të shumta, asnjë nga skuadrat nuk mundi të shënonte.

Elbasani mbetet në vendin e pestë me 36 pikë, ndërsa Teuta është në vendin e parafundit me 29 pikë.

Në një tjetër takim të javës, Partizani siguroi një fitore të vonuar kundër Skënderbeut. Goli i Elekes në minutën e 91-të i dha fitoren të kuqve, të cilët morën fitoren e parë pas shtatë ndeshjesh.

LEXONI GJITHASHTU:

• Dhuna në derbin Partizani-Tirana, FSHF ja faturon fajin policisë
• “Tirana më e dobët e 20 viteve të fundit”, Dabulla: Ekipit i mungon dhe lideri