Spitali i ri i sëmundjeve të brendshme në Qendrën Spitalore Universitare “Nënë Tereza”, i cili u inaugurua anë 22 mars të vitit të shkuar, vetëm godinën ka të re, pasi shumica e pajisjeve brenda tij janë të vjetra.
Kontrolli i Lartë i Shtetit në auditit e ushtruar në këtë godinë ka konstatuar se ndryshe nga sa janë të paraqitura në kontratat e kompanive fituese të tenderëve për pajisjen me shtretër, tavolina dhe dollapë të rinj për dhomat e ekzaminimeve, të mjekëve dhe pacientëve, mobiliet janë të përdorura dhe nuk janë zbatuar specifikimet teknike.
“Nga verifikimi fizik i kryer në Spitalin A2 (Urgjencës), më datë 27 dhe 28.03.2023, u konstatua se në 1312 copë për 6 artikuj në vlerën 25,605,000 lekë me TVSH nuk janë zbatuar specifikimet teknike, si dhe mobiliet janë të pashoqëruara me certifikatën e origjinës, raportet e testeve, certifikatat e cilësisë, certifikatat e garancisë për mallrat. U konstatua se 130 shtretër pacienti me kontroll manual për vlerën 12,480,000 lekë me TVSH, nuk janë të rinj, por të përdorur”, thuhet në raportin e KLSH.
Audituesit kanë konstatuar në disa shërbimet të godinës së spitalit të ri, mobiliet e vendosura nuk plotësojnë kriteret e përcaktuara.
“Dollapët duhet të ishin të rinj, në fakt janë të përdorur, llamarinë e lyer me bojë, portat nuk mbyllen lehtësisht, por bëjnë shumë zhurmë. Kati i tretë, dermatologji, dhomë pacienti nr 1. Ka dy dollapë me dimensione 44.45 i thellë, i gjerë 90.5 cm. Në specifikimet teknike dimensionet janë: minimum 50x50x200 cm dhe maksimumi 60x60x210. Nuk ka aksesorë metalikë, por ca vrima për të hapur kanatet”, theksohet më tej në raport.
Nisur nga këto verifikime, Kontrolli i Lartë i Shtetit ka kërkuar që dy kompanitë fituese të tenderit të kthejnë mbrapsht paratë, pasi janë përfituar padrejtësisht si pasojë e moszbatim të specifikimeve teknike në kontratën “Mobilimi i Spitalit të Ri të Ndërtuar”.
LEXONI GJITHASHTU:
- Skandal me QSUT, KLSH: Kabineti i endoskopisë në spitalin e ri, i pacertifikuar
- Zjarr në Urgjencën e QSUT, merren masa për sigurimin e pacientëve
