‘Koha për integrimin e Ballkanit’- Kancelari Scholz: Është krijuar një moment i ri

Kancelari gjerman Olaf Scholz ka deklaruar se është krijuar një moment i ri për integrimin e Ballkanit Perëndimor në Bashkimin Europian.

Në konferencën e dhënë për mediat me kryeministrin slloven Robert Golob, kancelari gjerman u shpreh se në 20 vitet e fundit nuk është bërë përparimi i duhur me Ballkanin Perëndimor.

“Më shumë se 20 vite më parë në Selanik, shteteve të Ballkanit Perëndimor iu ofrua anëtarësimi në Bashkimin Europian, por nuk pati shumë përparim. Prandaj është e rëndësishme të kuptojmë që tani është krijuar një moment i ri dhe të arrijmë përparim në çështjet e shumta që dalin”, tha Scholz.

Kancelari vlerësoi se hapja e negociatave me Bosnje-Hercegovinën është një zhvillim pozitiv që jep sinjale të qarta për vëmendjen që Europa i kushton Ballkanin. Nga ana tjetër ai theksoi se kushdo që shpreson për anëtarësim në BE duhet të jetë i vetëdijshëm se është jo një vendim gjeopolitik, por një proces që shoqërohet me reforma.

Scholz tha se Gjermania është duke asistuar të gjitha vendet e Ballkanit, por dhe Ukrainën dhe Gjeorgjinë për të realizuar reformat e duhura.

LEXONI GJITHASHTU:

• Kancelari Scholz nuk ndryshon qëndrimin: Raketat Taurus s’duhen dërguar në Ukrainë
• Scholz: BE-ja do të përdorë të ardhurat nga asetet ruse për të blerë armë për Kievin