Komandant “Ujku”, flet dëshmitari i 7-të kundër Pjetër Shalës në Hagë

Në seancën gjyqësore në rastin kundër Pjetër Shalës i njohur me nofkën komandat “Ujku”, tashmë ka nisur dhënien e  dëshmisë së tij dëshmitari i shtatë me pseudonimin TW4-01.

Ndërsa ky dëshmitar ndodhet në sallën e gjyqit, kryetarja e trupit gjykues, Mappie Veldt-Foglia e ka njoftuar atë me masat mbrojtëse. Ajo shtoi se për arsye të mbrojtjes së identitetit të tij pjesa më e madhe e dëshmisë do të jetë në seancë private.

Trupi gjykues theksoi se pas përfundimit të dëshmisë së këtij dëshmitari, zbardhja e dëshmisë së tij do të rishikohet në kohën e duhur dhe do të bëhet publike sa më shumë që të jetë e mundur.

Zyra e Prokurorit të Specializuar ka paraparë që për 12 orë të bëjë pyetje për dëshmitarin e shtatë.

Pjetër Shala, seancën e sotme po e përcjell nga qendra e paraburgimit përmes një video-telefonate.

Shala ndodhet në Hagë prej marsit të vitit 2021.

Sipas Speciales krimet për të cilat akuzohet Shala u kryen përafërsisht midis 17 majit 1999 dhe 5 qershorit 1999 kundër personave që u mbajtën të ndaluar në fabrikën e metalit në Kukës, që pretendohet se përdorej prej Ushtrisë Çlirimtare të Kosovës.

Pjetër Shala u arrestua më 16 mars 2021 nga autoritetet belge dhe u transferua në Hagë më 15 prill të atij viti.

LEXONI GJITHASHTU:

• Kompania izraelite ngre alarmin: Grupi i Wagner është nisur drejt Kosovës
• Deklaroi se Kosova është zemra e Serbisë, zhgarravitet portreti i tenistit serb