Komisioni Evropian denoncon Hungarinë për sulm ndaj komunitetit LGBTI

Komisioni Evropian ka denoncuar Hungarinë në Gjykatën Evropiane të Drejtësisë në lidhje me të ashtuquajturin akti i mbrojtjes së fëmijëve, që vë në shënjestër komunitetin LGBTI.

Ligji ndalon portretizimin e homoseksualitetit në tekstet për të miturit, gjë që qeveria hungareze e konsideron pjesë të luftës kundër pedofilisë.

Komisioni Evropian nisi një proces për shkelje ndaj Budapestit vitin e kaluar dhe tani deklaron se përgjigjet e qeverisë hungareze nuk ishin të përshtatshme.

“Komisioni vlerëson se ky ligj shkel ligjet e brendshme të BE-së dhe ato për mbrojtjen e individëve, sa i takon të drejtave të tyre themelore dhe vlerave evropiane, të cituara në nenin 2 të Traktatit të BE-së”, u shpreh zëdhënësi i Komisionit Evropian, Christian Wigand.

Në dekadën e fundit, Hungaria ka qenë në përplasje me Bashkimin Evropian edhe lidhur me regresin e standardeve demokratike të saj dhe për çështjen e sundimit të ligjit.

Organizatat evropiane që mbështesin komunitetin LGBTI mirëpritën masat e Komisionit, por bënë thirrje për një ndëshkim financiar më të madh derisa gjykata evropiane të marrë vendimin.

“Kjo është një fitore e rëndësishme simbolike për komunitetin tonë. Ne jemi të sigurt se do ta fitojmë këtë çështje në Gjykatën Evropiane të Drejtësisë, por ndërkohë Orban do të vazhdojë të sulmojë komunitetin tonë atje. Edhe Komisioni duhet të marrë masa dhe do t’i bëjmë thirrje të zbatojë mekanizmin e sundimit të ligjit për këto agresione që i bëhen LGBTI-së në Hungari”, tha drejtori ekzekutiv i Forbidden Colours, Remy Bonny.

Komisioni denoncoi në Gjykatën Evropiane të Drejtësisë edhe rastin e radios hungareze “Klub Radio”.

Stacionit radiofonik opozitar iu hoqën frekuencat vitin e kaluar, veprim që për Brukselin ishte jotransparent dhe jo në proporcionin e duhur. 

LEXONI GJITHASHTU

• 5 paradat e krenarisë të komunitetit LGBTI+ në Europë gjatë qershorit
• Parada e komunitetit LGBTI shoqërohet me përplasje dhe arrestime në Turqi
• Dyfishohet numri i të rinjve LGBT në SHBA dhe Mbretëri të Bashkuar