Komiteti Parlamentar Shqipëri-BE, ja kur do të mbahet takimi i 20-të

Takimi i 20-të i Komitetit Parlamentar të Stabilizim-Asociimit (KPSA) ndërmjet Shqipërisë dhe Bashkimit Europian do të zhvillohet në datat 28-29 tetor 2025, në ambientet e Hotel “Mak Albania”, Salla “Iliria”.

Takimi pritet të nisë rreth orës 15:30-16:45 dhe do të udhëhiqet nga dy bashkëkryetarët e tij: z. Taulant Balla, Kryetar i delegacionit të Kuvendit të Shqipërisë, dhe z. Marco Tarquinio, Kryetar i delegacionit të Parlamentit Europian.

Në hapje të aktivitetit, përshëndetje do të bëjnë: Kryetari i Kuvendit të Shqipërisë, z. Niko Peleshi; Ministrja për Evropën dhe Punët e Jashtme, znj. Elisa Spiropali; Ambasadori i Republikës së Polonisë në Shqipëri, Sh. T. Z. Wojciech Unolt, në emër të Presidencës Daneze të Këshillit të BE-së; Ambasadori i Bashkimit Europian në Shqipëri, Sh. T. Z. Silvio Gonzato, në emër të Komisionit Europian; si dhe Raportuesi i Përhershëm i Parlamentit Europian për Shqipërinë, z. Andreas Schider.

Takimi do të zhvillohet në dy sesione kryesore:

Sesioni i Parë, i cili do të mbahet më 28 tetor 2025 nga ora 17:00 deri në 19:30, do të fokusohet në:

1. Negociatat e anëtarësimit të Shqipërisë me Bashkimin Europian, politika e jashtme, marrëdhëniet e fqinjësisë së mirë dhe bashkëpunimi rajonal.

2. Progresi dhe sfidat në sektorët e ekonomisë, energjisë, mjedisit dhe turizmit në Shqipëri.

Sesioni i Dytë, më 29 tetor 2025, do të zhvillohet nga ora 10:00 deri në 12:30 dhe do të përfshijë:

1. Progresin dhe sfidat e institucioneve të shtetit të së drejtës, luftën kundër korrupsionit dhe të gjitha formave të krimit.

2. Respektimin e të drejtave të njeriut, të drejtave të minoriteteve dhe lirisë së medias.

3. Çështje të tjera dhe diskutimin mbi datën dhe vendin e takimit të radhës të KPSA-së.

Ky aktivitet do të zhvillohet në një klimë bashkëpunimi të thelluar mes Shqipërisë dhe Bashkimit Europian, duke u fokusuar në përparimet dhe sfidat kyçe që lidhen me procesin e integrimit të vendit në BE.