“‘Komploti’ një profeci për vitet 2043-2044”- Baro zbulon detaje nga libri i Blushit

Kryeredaktorja e shtëpisë botuese “Pegi”, Aida Baro, ishte e ftuar mëngjesin e kësaj të mërkure në emisionin “Goodmorning Albanians”, ku foli në lidhje me botimet që do të prezantohen në Panairin e Librit.

Baro u ndal dhe te libri “Komploti”, i autorit Ben Blushi, të cilin e cilësoi si një profeci për të ardhmen.

Ajo zbuloi një pjesë të shkurtër nga subjekti, për të cilin tha se ngjall kureshtjen e lexuesve dhe nxit imagjinatën për të ardhmen e Shqipërisë.

Sipas saj, autori parashikon që në 20 vitet e ardhme, si pasojë e globalizimit dhe lëvizjeve të popullsisë, Shqipëria do të jetë e shpopulluar nga shqiptarët dhe e populluar nga të huajt, kryesisht afganë.

Komploti sipas kryeredaktores nis kur kryebashkiaku afgan i Shëngjinit, i cili më pas zgjidhet Ministër i Mbrojtjes, nis luftën për çlirimin e Kosovës dhe bashkimin e saj me Shqipërinë.

Baro tha se një pjesë e profecisë mund të thuhet e “realizuar”, me marrëveshjen e nënshkruar për emigrantët mes kryeministrit Rama dhe Melonit, për ngirtjen e qendrave të emigrantëve në Shëngjin.

“Mua më ka pëlqyer jashtë mase, historia është goxha komplekse, flitet për një Shqipëri të 2043-2044-ës. Është një epokë që kur e thua të duket një epokë shumë e largët, por kur e mendon, jemi janë thjesht 20 vite që na ndajnë nga ajo periudhë. Parashikimi i një ngjarjeje të tillë, ku shqiptarët kanë ikur, Shqipëria pothuajse është zbarazur nga vendasit, ndërkohë që afganët kanë krijuar qytetin e tyre në Shëngjin, kryetar bashkie është një afgan dhe ai është martuar me një vajzë shqiptare. Dhe këtu fillon komploti sepse ai vendos që Kosova duhet të jetë e jona, duhet të jetë e Shqipërisë, por duke ftuar të luftojnë afganët. Në një farë mënyre futen në lojë 3 hebrenj të cilët duke parë një ngërç në këtë situatë, duke krijuar secili skenar të veçantë krijohet një komplot dhe në fund bëhet një sondazh kë duan më shumë shqiptarët: Amerikën apo Rusinë?

Aty ka parathënie të asaj që ndodhi para pak ditësh. Vendimi për firmosjen e marrëveshjes mes Ramës dhe Melonit për emigrantët është një lloj parathënie, është në një farë mënyrë një lloj profecie. Është një libër paralajmërues.

Jemi duke e përjetuar dhe nuk po e kuptojmë, jemi në fazat e para të asaj profecie që është thënë aty, por nuk po e kuptojmë. Londra nuk ka kryetar bashkie një indian? Pse duhet të na tremb kjo?! Ne shohim që bota është globalizuar”, tha Baro.

LEXONI GJITHASHTU:

• “Komploti” prezantohet në Prishtinë
• Ben Blushi: Hamasi, Izraeli dhe Kosova