Konflikti Tajlandë-Kamboxhia rrezikon të përshkallëzohet në luftë të hapur

Konflikti kufitar mes Tajlandës dhe Kamboxhias ka hyrë në një fazë alarmante, me autoritetet tajlandeze që paralajmërojnë se përplasjet ushtarake të fundit mund të përshkallëzohen në një luftë të hapur.

Deri më tani, si pasojë e përshkallëzimit të dhunës, janë raportuar të paktën 16 viktima dhe mijëra banorë nga të dyja vendet janë detyruar të braktisin banesat e tyre.

Kryeministri i Tajlandës, Phumtham Wechayachai, konfirmoi se përplasjet janë përhapur në të paktën 12 zona përgjatë kufirit lindor, ndërsa ushtria tajlandeze ka evakuuar plotësisht fshatrat që ndodhen brenda rrezes së sulmeve me raketa nga Kamboxhia.

Shtetet e Bashkuara të Amerikës, Bashkimi Evropian, Australia dhe Kina kanë bërë thirrje për një armëpushim të menjëhershëm. Kryeministri i Malajzisë, Anwar Ibrahim, aktualisht në krye të ASEAN-it, ka ofruar ndërmjetësimin e tij për rifillimin e bisedimeve paqësore.

Ndërkohë, Ministria e Jashtme e Tajlandës ka deklaruar se nuk e sheh të nevojshme ndërhyrjen ndërkombëtare, duke theksuar se situata mund të zgjidhet përmes dialogut dypalësh. Zëdhënësi i ministrisë, Nikorndej Balankura, i tha agjencisë Reuters se “Phnom Penhi duhet të ndalojë lëvizjet e saj ofensive”.

Nga ana tjetër, Kamboxhia i ka kërkuar zyrtarisht Këshillit të Sigurimit të OKB-së ndërhyrje për të “ndalur agresionin tajlandez”. Të dyja palët vazhdojnë të akuzojnë njëra-tjetrën për nisjen e përplasjes së armatosur. Tajlanda pretendon se incidenti u shkaktua nga përdorimi i dronëve vëzhgues kamboxhianë në territorin e saj, ndërsa Kamboxhia akuzon ushtrinë tajlandeze për shkelje të një marrëveshjeje paraprake, duke avancuar drejt një tempulli Khmer-Hindu në një zonë kufitare të kontestuar.

Këshilli i Sigurimit i OKB-së pritet të mblidhet të premten për të shqyrtuar situatën.

LEXONI GJITHASHTU:

• Konflikt i armatosur mes Tajlandës dhe Kamboxhias: 12 të vrarë, dhjetëra të plagosur
• Trump njofton një tjetër takim me Netanyahun: Duhet ta zgjidhim çështjen e Gazës