Konjufca: S’do lejojmë që Vuçiçi të komandojë në Kosovë përmes bandave kriminale

Kryetari i Kuvendit të Kosovës, Glauk Konjufca deklaroi se nuk do të lejohet që Presidenti i Serbisë, Aleksandër Vuçiç të komandojë në Kosovë pëmes bandave kriminale.

Deklaratën, Konjufca e dha pas takimit në Shkup me kryetarin e Kuvendit të Maqedonisë së Veriut, Talat Xhaferi.

Sipas tij, vendosja e barrikadave në veri nga ana e serbëve, është e paligjshme.

“Serbia, në anën tjetër, u përgjigj me mbështetjen e eksponentëve, të cilët janë në krye të krimit të organizuar në atë pjesë të Kosovës, e të cilët ndërmarrin veprime të dhunshme dhe të armatosura kundër Policisë së Kosovës dhe i mbyllin rrugët e karakterit ndërkombëtar përmes vendosjes së barrikadave të paligjshme. Nuk do të lejojmë që brenda territorit të Kosovës, Vuçiçi të komandojë përmes këtyre bandave”, theksoi ai.

Edhe të hënën ka vazhduar bllokimi i rrugëve në pikat kufitare Jarinjë dhe Bërnjak që lidhin Kosovën me Serbinë.

Serbët lokalë në pjesën veriore nuk po tërhiqen, ndërsa vazhdojne t’i mbajnë automjetet e rënda me të cilat kanë krijuar barrikada në këto rrugë. Situata afër barrikadave po monitorohet nga KFOR-i.

Në Rudarë, përveç forcave polake të KFOR-it që po qëndron vazhdimisht, aty u panë edhe pjesëtarë amerikan e gjerman te NATO-s.

LEXONI GJITHASHTU

• Njerëz të maskuar në pikat kufitare, ende e bllokuar lëvizja në Jarinjë e Bërnjak
• Vuçiç: Më 15 dhjetor, kërkesë KFOR-it për dërgimin e 1 mijë trupave serbe në Kosovë
• Vuçiç-ndërkombëtarëve: Kosova nuk po respekton asnjë marrëveshje