Konjufca: Thirrje ambasadave të dënojnë dhunën kriminale të mbështetur nga Vuçiç

Kryetari i Kuvendit të Kosovës Glauk Konjufca ka reaguar me anë të një postimi në Facebook, lidhur me situatën në veri të Kosovës.

Ai tha se nga kjo ngjarje u kuptua edhe një herë ajo që dihej që Serbia synon ta mbajë të shkëputur pjesën veriore nga ligji dhe rendi i Republikës së Kosovës.

Me anë të postimit të tij, ai i bëri thirrje ambasadave që të dënojnë dhunën e strukturave kriminale, të cilat sipas tij janë haptazi të mbështetura nga presidenti serb, Aleksandër Vuçiç

“Dënoj ashpër dhunën e bandave të organizuara kriminale serbe ndaj trupave të KFOR-it, Policisë së Kosovës dhe gazetarëve në terren! Shpreh solidaritetin tim personal dhe institucional për 25 ushtarët e plagosur të misionit paqeruajtës dhe uroj shërim sa më të shpejtë!

Pjesëmarrja e njerëzve të maskuar në atë që u prezantua si protestë, shpërfaqja e simbole të luftërave gjenocidale serbe dhe pushtimit rus në Ukrainë, sulmet ndaj gazetarëve dhe mediave, përdorimi i mjeteve dhe dhunës së rëndë ndaj trupave të ruajtjes së rendit, tregojnë atë që tashmë dihej: synimin për ta mbajtur të shkëputur pjesën veriore të vendit tonë nga çdo prekje e ligjit dhe rendit që disponon Republika e Kosovës.

Ndërkohë, shfrytëzoj rastin t’u bëj thirrje ambasadave të vendeve mike ta dënojnë ashpër dhunën e strukturave kriminale, të cilat haptazi janë të mbështetura nga presidenti serb, Aleksandër Vuçiç dhe që synojnë destabilizimin e vendit tonë!

Gjithashtu, i bëj thirrje organeve kompetente të drejtësisë që të nisin hetimet ndaj atyre që i bënë këto akte të dhunshme ndaj trupave të KFOR-it, Policisë së Kosovës dhe gazetarëve të terrenit!

Është koha që dhunës t’i përgjigjemi me një zë të përbashkët. Ajo nuk mund të tolerohet!”-shkruan Glauk Konjufca.

LEXONI GJITHASHTU:

• Kërcënon Vuçiç: Ushtria jonë është vendosur aty ku duhet, nëse shqiptarët qëllojnë…
• Policia e Kosovës: Janë lënduar disa ushtarë të KFOR-it në veri, 5 të arrestuar