Koreja e Jugut: Tarifat amerikane për automjetet do të ulen në 15%

Koreja e Jugut ka njoftuar se Shtetet e Bashkuara do të ulin tarifat për automjetet koreane në 15%, në kuadër të një marrëveshjeje të re tregtare që synon të lehtësojë barrën për prodhuesit koreanë të makinave dhe çelikut.

Shefi i politikave presidenciale të Koresë së Jugut, Kim Yong-beom, tha se marrëveshja u arrit të mërkurën dhe se aktualisht po përcaktohen detajet përfundimtare të saj.

Në mungesë të kësaj marrëveshjeje, prodhuesit e automjeteve dhe çelikut të Koresë së Jugut do të duhej të paguanin tarifa amerikane prej 25%, çka i vendoste ata në disavantazh ndaj konkurrentëve japonezë, të cilët pas marrëveshjes së Tokios me Uashingtonin paguajnë vetëm 15%.

Kim shtoi gjithashtu se tarifat e SHBA-së për çipat ndaj Koresë së Jugut nuk do të jenë më të pafavorshme krahasuar me ato që zbatohen ndaj Tajvanit, një tjetër prodhues kryesor në tregun global të gjysmëpërçuesve.