Korrupsion në zgjedhje/ SPAK dhe policia e Kukësit shpallin në kërkim 2 persona

Policia e Kukësit, në bashkëpunim të ngushtë me Prokurorinë e Posaçme Kundër Korrupsionit dhe Krimit të Organizuar (SPAK), ka ushtruar kontrolle në banesat e dy shtetasve, Gazmend Peposhi dhe Kalosh Peposhi, në kuadër të një hetimi për korrupsion zgjedhor.

Sipas autoriteteve, ndaj tyre rëndon akuza për veprën penale “Korrupsioni aktiv në zgjedhje”, kryer në bashkëpunim, e parashikuar nga nenet 328 dhe 25 të Kodit Penal. Të dy shtetasit janë shpallur në kërkim dhe forcat e rendit vijojnë punën për lokalizimin dhe kapjen e tyre.

Hetimet po drejtohen nga SPAK, ndërsa strukturat hetimore të Drejtorisë Vendore të Policisë Kukës janë duke punuar intensivisht për identifikimin e personave të tjerë të përfshirë në këtë skemë. Dyshohet se janë shpërndarë para për të orientuar votën e qytetarëve në favor të një subjekti të caktuar politik.

Autoritetet kanë bërë të ditur se veprimet hetimore do të vijojnë deri në zbardhjen e plotë të çështjes dhe ndëshkimin e personave përgjegjës.

LEXONI GJITHASHTU:

• “Giro D’Italia” në Vlorë/ PS kërkoi në KQZ shtyrje të orarit të votimit, PD kundër
• PD depoziton kërkesë ankimore në KQZ për votat e diasporës nga Greqia