Kosha për mbeturina të diferencuara, qytetarët në Durrës mbështesin projektin

Prej rreth një jave, në rrugët kryesore të Durrësit dhe në zonën e plazhit janë vendosur 300 kazanë plastikë për diferencimin e mbetjeve urbane që në burim.

Mirëpo nga vëzhgimi në terren, rezulton se qytetarët durrsakë nuk i ndajnë mbetjet në kazanët respektivë.

“Përse në këto ditë të para asgjë nuk ka ndryshuar? Është ky një rezultat i mungesës së fushatave sensibilizuese, apo mungesë vullneti për t’i ndarë? Për këtë qytetarët ndahen në mendime.”

“Kulturë nuk ka me thënë të drejtën, por nuk janë dhe të informuar.”- thotë një qytetare.

“Nga grumbullimi i madh i hedhin edhe në tokë. Plus këta në shtëpitë private pastrojnë kopshtet dhe nuk i hedhin, koshi bosh ato i hedhin në tokë, i vënë dhe flakën.”- shprehet një tjetër.

“Unë kam qenë në Itali te fëmijët dhe atje i ndaja.”- nënvizon e moshuara.

“Se ne i kemi parë dhe ndarë andej, kur shkojmë tek fëmijët, siç na thonë ata. Edhe këtu e bëjmë po të jetë. Edhe unë në shtëpi vendos dy kosha. Në një vend vendos letrat e kartonat e në një tjetër këto tjerat.”- thotë një tjetër qytetare.

“Do e bëjmë dhe ne, do bëhemi të kulturuar me zor përderisa kanë sjellë koshat, se nëse ai nuk i hedh aty ku duhet, duhet të gjobitet, unë jam e para.”- shton një tjetër.

Ndarjen nuk e respekton as vetë bashkia, sepse mbetjet nga kazanët mblidhen të gjithë njësoj.

“Nëse bashkia nuk ka mjete t’i transportojë kështu koshat, atëherë kot që i vendos, vetëm për të na gënjyer ne.”-thotë i moshuari.

“Nëse unë i hedh shishet këtu e plehrat këtu, kurse bashkia i mbledh bashkë, ç’kuptim ka pastaj?”

“Po do t’i bëjmë edhe kamionët se sa marrin lekë për vete ata, të punësojnë njerëz e makinat e të vijnë t’i marrin, pse jo?”- thekson qytetarja.

Në një pikë, qytetarët e Durrësit bien dakord. Ky është një projekt i vonuar.

“30 vjet, shumë e vonuar.”- shprehet i moshuari.

“Shumë e vonuar. Se është katastrofë të mos e shohim këtë Shqipëri kaq të bukur sa është, si gjithë bota. Pse mos të bëhemi dhe ne si të gjithë, që t’i hedhim mbeturinat atje ku duhet?”- thotë një grua.

Momentalisht kazanët janë ndryshuar vetëm në pikat kryesore të qytetit, por jo në ato periferike.

Atje ky projekt pritet të nisë të implementohet në vitin 2023.

LEXONI GJITHASHTU: 

• 500 njerëz u vranë gjatë ndërtimit të stadiumeve e metrosë, thotë zyrtari i Katarit
• 3 mijë shqiptarë punuan në ndërtimin e stadiumeve për Kupën e Botës në Katar
• PD ‘harron’ festën e Çlirimit, asnjë s’bëri homazhe te varrezat “Dëshmorët e Kombit”