Kosova përballet me Islandën sonte në mbrëmje, pasi ka përmbyllur përgatitjet për këtë sfidë. Trajneri Franko Foda dhe sulmuesi Milot Rashica kanë analizuar ndeshjen, duke shprehur besimin e tyre te fitorja.

Një duel i vështirë për “Dardanët”, por jo i pamundur për të arritur një rezultat pozitiv që do të kishte shumë rëndësi për të ardhmen. Trajneri Foda theksoi rëndësinë e përqendrimit dhe presionit që nga minuta e parë.

“Islanda ka një ekip të organizuar taktikisht, por ne duhet të luajmë të përqendruar që nga fillimi. E dimë që kanë lojtarë cilësorë që luajnë në ekipe si Lille apo Real Sociedad, por më e rëndësishmja është që ne të zbatojmë detyrat tona në fushë. Duhet të ushtrojmë presion, të kemi një lojë kompakte dhe intensive që në minutën e parë,” deklaroi Foda.

Sulmuesi Milot Rashica e sheh kualifikimin si një ëndërr dhe thekson se fitorja është objektivi i vetëm.

“Kualifikimi është ëndrra jonë dhe duam ta arrijmë sa më shpejt. Çdo ndeshje na shërben për të matur forcën tonë, si skuadër dhe individualisht. Këto takime kanë rëndësinë e tyre, prandaj synimi ynë i vetëm është fitorja dhe kalimi tutje,” deklaroi Rashica.

Kosova dhe Islanda përballen sonte në Prishtinë, ndërsa në duelet e mëparshme mes tyre, islandezët kanë regjistruar dy fitore.

LEXONI GJITHASHTU:

• Hoxha dhe Shehu: Ndeshja ndaj Anglisë e vështirë, por do të japim maksimumin
• Ish-futbollisti i Kombëtares, Alliu: Kush e zëvendëson Mario Mitajn ndaj Anglisë