Kosova, censi në kohë rekord! Rezultati pas 2 muajve, në Shqipëri u vonuan 8 muaj

2 muaj kohë iu deshën Kosovës për të nxjerrë rezultatin e CENSI-t të vitit 2024. Ndryshe nga Shqipëria, ku të dhënat u nxorën 8 muaj pas anketimit në terren, Kosova po dëshmon me këtë proces se ka nxjerrë të dhëna të besueshme e të pa manipuluara.

Kosova ka 1.58 mln banorë. Pas Shqipërisë, edhe fqinjët tanë kanë nxjerrë rezultatet e CENSI-t atje, por ndryshe nga ne, publikimi i tyre është bërë vetëm 2 muaj pas anketës në terren. Për kryeministrin Kurti, shpallja e rezultatit në kohë është një sukses që e bën procesin të besueshëm.

Prezantimi i CENSI-t në Kosovë është bërë nga Agjencia e Statistikave në prani edhe të kryeministrit, ndërsa në Shqipëri, kreu i qeverisë ka qendruar në hije dhe nuk e ka komentuar rezultatin. Kjo indiferencë, dhe vonesat në shpallje, kanë nxitur dyshime për manipulime me statistikat në vendin tonë.

Por, si ka ndryshuar demografia gjatë 10-vjecarit të fundit në të dy vendet shqipfolëse?

Që nga viti 2011, Shqipëria ka humbur 410 mijë banorë, ose 16% të popullsisë rezidente, ndërsa Kosova humbur 153 mijë banorë, ose 9% të popullsisë.

Të dhënat tregojnë se në Shqipëri, vetëm një bashki nga 69 ka numër më të madh banorësh, ndërsa Kosova ka rritje në 9 nga 38 komunat e saj.

Ndryshimet demografike të kësaj dekade, kanë sjellë plakje të popullsive, por në Shqipëri për shkak të largimit masiv të të rinjve dhe rënies së lindjeve, mosha mesatare është rritur me 7 vite.

LEXONI GJITHASHTU:

• Të dhënat e Censit: Sa jetojnë mesatarisht shqiptarët
• Pikëpyetjet e censit, drejtoresha e INSTAT: Të dhënat u nxorën shpejt, asnjë gabim