Kryeministri i Kosovës, Albin Kurti ka reaguar pas deklaratës së Presidentit të Serbisë, Aleksandar Vuçiç, i cila tha se do t’i bëjë kërkesë KFOR-it, për dërgimin e pjesëtarëve të ushtrisë dhe policisë serbe në Kosovë.
Përmes një postimi në rrjetet sociale, Kurti theksoi se Kosova nuk kërkon konflikt, por do të mbrohet me forcë dhe vendosmëri.
Deklaratën e Vuçiçit, Kurti e ka cilësuar kërcënim me agresion ushtarak.
“Presidentja dhe kryeministri i Serbisë kanë kërcënuar edhe me agresion ushtarak, duke kërkuar që ushtria serbe të kthehet në territorin tonë. Ne nuk kërkojmë konflikt, por dialog dhe paqe. Por më lejoni të jem i qartë: Republika e Kosovës do të mbrohet – me forcë dhe vendosmëri”, shkroi ndër të tjera Kurti në Twitter.
The President and PM of Serbia have also threatened military aggression, calling for the Serbian army to return to our territory. We do not seek conflict, but dialogue and peace. But let me be clear: the Republic of Kosova will defend itself — forcefully and decisively.
— Albin Kurti (@albinkurti) December 11, 2022
Presidenti i Serbisë, Aleksandar Vuçiç tha se do t’i drejtohet KFOR-it me kërkesë për lejimin e dërgimit të trupave ushtarake dhe policore serbe në Kosovë.
Gjatë një konference për mediat në Beograd, Vuçiç bëri të ditur se vendimi i qeverisë do të merret të hënën ose të martën.
“Ne u dakordësuam sot për tekstin që t’i dërgojmë një kërkesë komandantit të KFOR-it, në përputhje me Rezolutën 1244, për të siguruar dislokimin e pjesëtarëve të ushtrisë dhe policisë serbe në territorin e Kosovës dhe vendimi i qeverisë për këtë çështje do të merret të hënën ose të martën”, nënvizoi ai.
LEXONI GJITHASHTU
- Sulmohet patrulla e EULEX-it në veri të Kosovës
- Serbët u detyruan që t’i vendosnin barrikadat në veri, thotë Vuçiç
- Petkoviç: Serbët janë ngopur me terrorin e Kurtit, nuk durojnë më