Kosova heq tarifën doganore për produktet amerikane

Kryeministri në detyrë i Kosovës, Albin Kurti, njoftoi këtë të premte vendimin për heqjen e tarifës doganore prej 10 për qind mbi mallrat me origjinë nga Shtetet e Bashkuara të Amerikës. Ky vendim hyn në fuqi menjëherë dhe synon të forcojë marrëdhëniet ekonomike dhe politike mes dy vendeve, sipas kryeministrit.

“Tani e tutje, të gjitha produktet me origjinë nga Shtetet e Bashkuara do të kenë tarifë 0 për qind kur të hyjnë në vendin tonë. Kosova i mirëpret produktet amerikane në tregun e saj dhe besojmë fuqishëm se kjo do të ndikojë në rritjen e këmbimit tregtar dhe shtimin e investimeve”, deklaroi Kurti në hapje të mbledhjes së Qeverisë.

Sipas tij, ky hap është një dëshmi konkrete e marrëdhënieve të shkëlqyera mes Kosovës dhe SHBA-së dhe përforcon përkushtimin institucional të Kosovës për të arritur një marrëveshje për tregti të lirë me Uashingtonin.

LEXONI GJITHASHTU:

• Trump shpall tarifat ndëshkuese deri në 41% për 68 shtete dhe BE-në
• “Tarifat e reja”, reagon kryeministri kanadez: Jemi të zhgënjyer nga SHBA