Kosova merr sistemet antitank nga Turqia

Qeveria e Kosovës ka marrë sot dërgesën e radhës të sistemeve raketore anti-tank OMTAS, të kontraktuara me prodhuesin shtetëror turk “Roketsan” në dhjetor të vitit 2023.

Lajmi është konfirmuar nga Ejup Maqedonci, ministër në detyrë i Mbrojtjes, përmes një reagimi në rrjetet sociale.

“Sot pranuam dërgesën e radhës të sistemeve raketore anti-tank OMTAS, të kontraktuara me prodhuesin shtetëror turk Roketsan në dhjetor të vitit 2023.OMTAS (Orta Menzilli Tanksavar Silah) është një sistem modern raketor anti-tank me rreze të mesme veprimi, i zhvilluar për të neutralizuar mjete të blinduara moderne, përfshirë tanke me mbrojtje reaktive, si dhe fortifikata mbrojtëse ushtarake”, ka shkruar Maqedonci në Facebook.

Ministri shton se “rritja e llojllojshmërisë dhe sasisë së sistemeve raketore anti-tank për ushtrinë tonë ka për qëllim mbulimin e distancave të ndryshme të veprimit, terreneve dhe skenarëve të kërcënimit, duke rritur fleksibilitetin operacional”.

Për marrjen e sistemit raketor ka reaguar dhe Presidentja e Kosovës, Vjosa Osmani . Presidentja ka falënderuar Turqinë për armatimin sistemeve raketore anti-tank.

“Faleminderit Turqi”, ka shkruar Osmani në Facebook.