Kosovë/ Vetëvendosja mbyll fushatën e zgjedhjeve lokale në Deçan

“Lëvizja VETËVENDOSJE” ka mbyllur fushatën zgjedhore në komunën e Deçanit, ku kandidati për kryetar, Faton Selmanaj, prezantoi para qytetarëve programin e tij për komunën. I pranishëm ishte edhe kryetari i Lëvizjes VETËVENDOSJE!, Albin Kurti.

Gjatë prezantimit të programit, Selmanaj tha se Deçani është një pasuri kombëtare dhe se nën udhëheqjen e tij, kjo komunë do të shndërrohet në një model zhvillimi për gjithë vendin. Ai u zotua për furnizim të rregullt me ujë të pastër për çdo shtëpi, ndërtim të rrugëve dhe urave të sigurta e moderne me ndriçim publik, shëndetësi cilësore me pajisje të reja dhe mjekë të motivuar, arsim bashkëkohor me shkolla moderne dhe hapësira sportive, si dhe bursa për studentët.

Një pjesë e rëndësishme e programit, siç u tha gjatë tubimit, është edhe mbështetja e fuqishme për bujqësinë dhe turizmin, të cilat konsiderohen shtylla kryesore të ekonomisë lokale.

“Më 12 tetor, qytetarët e Deçanit vendosin për të ardhmen e tyre. Vendosin për Faton Selmanajn dhe Lëvizjen VETËVENDOSJE!”, u tha në përmbyllje të fushatës zgjedhore.