Kreditë me probleme ulen afër pragut 4 për qind

Kreditë me probleme kanë shënuar një nivel të ri në muajin shkurt. Sipas të dhënave të Bankës së Shqipërisë, ato përbënin 4.06% të totalit, nga 4.7% që rezultonin një vit më parë.

Ulja e raportit të kredive të këqija po ndikohet nga rritja e shpejtë e kreditimit të ekonomisë.

Në shifra, portofoli i kredisë për ekonominë arriti në 848 miliardë lekë, në rritje vjetore me 13%, ndërsa portofoli i kredive me probleme vlerësohet në afërsisht 34.4 miliardë lekë, nga 35.2 miliardë lekë që kishte qenë një vit më parë.

Një ndikim të rëndësishëm në uljen e raportit të kredive me probleme vlerësohet se ka dhënë edhe forcimi i Lekut në kursin e këmbimit me Euron gjatë dy viteve të fundit, ndërsa efekt pozitiv në aftësinë paguese të huamarrësve ka dhënë edhe ulja e shpejtë e normave të interesit.