Prej shumë vitesh, partitë politike diskutojnë për mundësinë e realizimit të votimit elektronik në të gjithë vendin.

Në zgjedhjet e pjesshme lokale të 6 marsit, në Bashkinë Vorë votimi dhe numërimi i votave u bë në mënyrë elektronike.

Kreu i Komisionit Qendror të Zgjedhjeve, Ilirjan Celibashi thotë se kjo eksperiencë e krijuar, bashkë me rastin e Njësisë nr. 10 në Tiranë në zgjedhjet e fundit parlamentare nuk është garanci për zbatimin e votimit elektronik në të gjithë vendin.

“Nëse partitë politike dhe qeveria e shikon me interes apo të mundshme zbatimi i votimit elektronik në të gjithë territorin Shqipërinë ky vendim do të duhet të merret sa më shpejt që të jetë e mundur. Përndryshe, KQZ nuk do të ketë kohën e mjaftueshme për ta zbatuar në të gjithë territorin.”, tha kreu i KQZ.

Në këtë situatë, Celibashi thotë se zgjidhja më e mirë do të ishte që në zgjedhjet e ardhshme lokale që do të mbahen në verën e vitit 2023, votimi elektronik të bëhet vetëm në disa bashki.

“Mund ta zbatojmë në një numër të caktuar bashkish dhe në gjykimin tim mendoj se do të vlente”, tha ai.