Kriza energjetike në RMV, Ramadani: Zero prodhim nga termocentralet, do ketë rritje çmimi

“Nesër do të shpallim gjendjen e jashtëzakonshme për krizën energjetike në Maqedoni të Veriut. Gjendja është alarmante”. Kështu u shpreh për Euronews Albania Kushtrim Ramadani, kryetar i Operatorit të Sistemit Elektrotransmetues në RMV.

Z. Ramadani theksoi se në këtë situatë do të ketë rritje të çmimit të energjisë, por momentalisht nuk do të ketë kufizime me energji.

“Pas vitit të ri do të kemi fatura të reja të energjisë”, u shpreh ai.

Z. Ramadani sqaroi se kohët e fundit ka pasur një keqmenaxhim të rezervave të ujit dhe se tani po punohet vetëm me 10% të kapacitetit.

“Nuk kemi prodhim momental nga termocentralet, e kemi zero”, theksoi ai.

Z. Ramadani u shpreh më tej se çmimi i naftës është i rregulluar me çmim tavan në këtë shtetet dhe se Komisioni Rregullator i Energjisë cakton çdo javë çmimet e naftës dhe derivateve të saj.

Ai shtoi se çmimi i naftës në RMV është më i lirë se në Shqipëri.