Krizë për fuqi punëtore në Rusi, mijëra koreano-veriorë i vijnë në ndihmë Putinit

Mijëra qytetarë të Koresë së Veriut kanë udhëtuar në Rusi me viza studentore për të punuar dhe për të ndihmuar në zbutjen e mungesës së fuqisë punëtore në sektorë të ndryshëm të ekonomisë, sipas raporteve nga agjencia e lajmeve Yonhap e Koresë së Jugut. Sipas informacionit të raportuar, shumica e këtyre punëtorëve janë angazhuar në sektorin e ndërtimit dhe kanë arritur në Rusi gjatë vitit 2024.

Në vitin 2024, rreth 13,221 koreano-veriorë kanë hyrë në Rusi, duke shënuar një rritje deri në 12 herë më të madhe sesa vitin e kaluar. Kjo shifër është një pasqyrë e rëndësishme e përpjekjeve të Rusisë për të zbutur krizën e fuqisë punëtore, pas shpërthimit të luftës në Ukrainë dhe ndikimeve të saj në sektorët ekonomikë të Rusisë, përfshirë ndihmën në industrinë e ndërtimit dhe mbrojtjes.

Sipas Institutit për Studimin e Luftës, Rusia ka pësuar mungesë të konsiderueshme të fuqisë punëtore që nga fillimi i pushtimit të Ukrainës dhe kjo mungesë arrin deri në 1.5 milionë punëtorë. Pavarësisht këtij fluksi të koreano-veriorëve, ekspertët vlerësojnë se kontributi i këtyre punëtorëve për të zbutur këtë mungesë do të jetë i kufizuar dhe se nuk do të ndikojë ndjeshëm në përmirësimin e situatës.

Ky veprim është një shkelje e drejtpërdrejtë e Rezolutës 2397 të Këshillit të Sigurimit të OKB-së, e cila ndalon kategorikisht Korenë e Veriut të dërgojë qytetarët e saj jashtë për punë.

Agjencia ISË thekson se Rusia mund të përdorë vizat studentore si një mjet për të fshehur këtë shkelje, duke e justifikuar si një mundësi për qytetarët e Koresë së Veriut të studiojnë në Rusi, ndërkohë që ata angazhohen në punë të tjera.

Po ashtu, ushtarët koreano-veriorë janë angazhuar në mbushjen e boshllëqeve në linjat e frontit të Rusisë, përfshirë në rajonin e Kurskut, ku ndihmojnë përpjekjet e Rusisë për të rikthyer territoret e pushtuara nga Ukraina.