Kroacia i përgjigjet Vuçiç: Nuk kemi gisht te protestat serbe

I menjëhershëm ka qenë reagimi i Kroacisë, e cila është shprehur se nuk ka asnjë interes për çështjet e brendshme të Serbisë dhe aq më pak të jetë një lloj kukulle që tërheq fijet prapa skenës për të nxitur protesta, deklaroi kryeministri Andrej Plenkoviç.

Sipas Plenkoviç, Kroacia ka si qëllim të vetëm marrëdhënie e qëndrueshme në fqinjësi.

“Përkundrazi, qëllimi ynë është marrëdhënie e qëndrueshme në fqinjësi. Në këtë kuptim, presim nga Serbia të tregojë një dëshirë të sinqertë për mbrojtjen e të drejtave të pakicave kroate në Serbi. Ashtu siç Kroacia është e përkushtuar kur bëhet fjalë për pakicën serbe në Kroaci”, është shprehur ai.

NATO është aleanca ushtarake më e fuqishme në histori, dhe Kroacia gëzon mbrojtje brenda sistemit të saj të sigurisë kolektive.

“NATO është gjithashtu një aleancë mbrojtëse, dhe si e tillë Kroacia nuk ka qëllim agresiv ndaj askujt. Megjithatë, raketat hipersonike që ka blerë Serbia nuk shërbejnë për mbrojtje kundër ajrore, por për sulme me rreze të gjata ndaj objektivave tokësore. Ndaj, njoftimi i NATO-s për këtë kërcënim ndaj aleancës është një procedurë normale, dhe në bisedime me aleatët tanë do të gjejmë një përgjigje të përshtatshme”, ka theksuar kryeministri Plenkoviç.

Sakaq, Plenkoviç holli poshtë pretendimin e Aleksandër Vuçiç se protesta studentore në Serbi ka marrë pjesë udhëheqja shtetërore kroate dhe angazhimi kroat i inteligjencës, duke i quajtur ato absurde.

Vuçiç, në kulmin e fushatës për zgjedhjet lokale në Serbi, tha se Kroacia kishte marrë pjesë drejtpërdrejt dhe shumë fuqishëm, më shumë se çdo vend tjetër. Ai iu referua lëvizjes studentore që kërkon luftë kundër korrupsionit dhe zgjedhje të parakohshme, raportoi radio televizioni kroat.

“Ne nuk mundemi të kemi asnjë interes si shtet të merremi me pjesën e brendshme të Serbisë dhe aq më pak të jemi një lloj prapa skene që tërheq fijet dhe organizon protesta,” tha Plenkoviç në një konferencë për shtyp.

Sipas tij, bëhet fjalë për teza të shpikura që tregojnë një keqkuptim të plotë të pozicionit të Kroacisë, e cila synon bashkëpunim në rajon.