Kryeministri britanik pëson goditje të dyfishtë, humbet në dy zgjedhje

Kryeministri britanik Boris Johnson pësoi një goditje të dyfishtë, pasi votuesit në dy zgjedhje refuzuan partinë e tij konservatore, duke i bërë presion të mëtejshëm liderit britanik në një kohë kur partia e tij duket se po largohet gjithnjë e më shumë prej tij.

Në njësinë rurale të Anglisë jugperëndimore të Tiverton dhe Honiton, Liberal Demokratët e qendrës përmbysën një shumicë të madhe konservatore, në atë që konsiderohet të jetë një nga rezultatet më të këqija zgjedhore për partinë në kohët moderne.

Të premten në mëngjes, kryetari i partisë, Oliver Dowden njoftoi dorëheqjen e tij, duke thënë se partia “nuk mund të vazhdojë si zakonisht”.

Ai shtoi se dikush duhet të marrë përgjegjësinë dhe nuk e cilësoi të drejtë të qëndronte në detyrë.  Në të njëjtën kohë, Partia Laburiste rifitoi Wakefield-in në Anglinë veriore nga konservatorët e Johnson.

Kreu i Downing Street  fitoi një shumicë të madhe në zgjedhjet e përgjithshme të vitit 2019 duke mbajtur votuesit tradicionalë të konservatorëve në Anglinë jugore dhe duke fituar votues të rinj në qytetet veriore më të varfra, post-industriale, ku shumë banorë janë ndjerë të anashkaluar nga qeveritë për dekada.

LEXONI GJITHASHTU:

• Porti i Konstancës në Rumani, qendra kryesore për eksportin e grurit ukrainas
• Pastroi 4 mld euro përmes bankës, dënohet lituanezja që bashkëpunonte me rusët