Kryeministri i Kanadasë njofton dorëheqjen

Kryeministri i Kanadasë, Justin Trudeau, njoftoi dorëheqjen të hënën, pas rritjes së pakënaqësive me udhëheqësin e tij dhe pasi largimi i papritur i ministres së tij të Financave vuri në pah rrëmujën brenda Qeverisë së tij.

Trudeau tha se “betejat e brendshme” nënkuptojnë se ai “nuk mund të jetë mundësia më e mirë” për zgjedhjet e ardhshme.

Ai tha se do të qëndrojë si kryeministër derisa Partia Liberale në pushtet ta zgjedhë liderin e vet të ri.

Një zyrtar tha për Associated Press në kushte anonime se Parlamenti, i cili duhej ta rifillonte punën më 27 janar, do të pezullohet deri më 24 mars. Kjo kohë do t’ia mundësojë Partisë Liberale të zgjedhë liderin e ri.

Të gjitha tri partitë në opozitë kanë thënë se synojnë ta rrëzojnë Partinë Liberale nga pushteti përmes votës së mosbesimit sapo ta rifillojë punën Parlamenti, prandaj është pothuajse e sigurt mbajtja e zgjedhjeve në pranverë.

Trudeau erdhi në pushtet në vitin 2015, pas 10 vjetësh sundimi nga Partia Konservatore. Në fillim, ai u lartësua për rikthimin e vendit në të kaluarën e tij liberale.

Por, 53-vjeçari, pasardhësi i një prej kryeministrave më të famshëm të Kanadasë, është bërë jashtëzakonisht i papëlqyeshëm për votuesit vitet e fundit për një sërë çështjesh, përfshirë rritjen e çmimeve të ushqimit dhe banimit, si dhe për shkak të numrit të madh të imigrantëve.

Trudeau ka qëndruar publikisht i heshtur javët e fundit, megjithëse është përballur me trysni të madhe për të dhënë dorëheqjen.

Ish-ministrja e Financave e Kanadasë, Chrystia Freeland, njoftoi dorëheqjen e saj nga kabineti i Trudeaut më 16 dhjetor, duke kritikuar disa nga prioritetet ekonomike të tij. Ky hap e tronditi vendin dhe ngriti pyetje se sa më gjatë mund të qëndronte në detyrë Trudeau, i cili po humbiste gjithnjë e më shumë popullaritet.

LEXONI GJITHASHTU:

• Ford: Nëse Trump tarifon Kanadanë, ndërpresim eksportin e energjisë drejt SHBA-së
• Trump synon Grenlandën dhe Kanalin e Panamasë