Kryeministri Rama thirrje qytetarëve të ruhen nga varianti Delta i COVID-19

Ndërsa vizitoi ditën e parë të vaksinimit të hapur për të gjitha moshat në një qendër shëndetësore në Dimal, kryeministri shqiptar Edi Rama u bëri thirrje qytetarëve të vaksinohen.

“Varianti i ri (Delta) është një variant agresiv, përhapet shpejt dhe është i rrezikshëm kur kap të pavaksinuarit. Vaksinimi nuk e bën 100% të paprekshëm individin nga virusi, por e bën virusin shumë më të dobët,”  – deklaroi Rama, teksa vlerësoi mënyrën si qeveria e tij kishte menaxhuar me efikasitet përballimin e situatës.

Kryeministri theksoi dobitë e vaksinimit duke thënë se përballimi i COVID-19 tek të vaksinuarit është shumë më i thjeshtë, pa shtrime në spital dhe vështirësi shëndetësore.

Të dhënat e Ministrisë së Shëndetësisë tregojnë se në rang vendi ka 156 raste aktive me COVID-19, ndërsa numri i viktimave nga Sars-Cov2 është ulur ndjeshëm krahasuar me muajt e tjerë. MSH llogarit se 2,456 qytetarë kanë humbur jetën nga COVID-19 në vend.

Shqipëria ka injektuar mbi 1 milionë vaksina sipas ministrisë.

Vaksinimi do të jetë i hapur për të gjithë qytetarët e interesuar përgjatë një jave, si një nismë e qeverisë për të promovuar mbrojtjen kundër COVID-19.

LEXONI GJITHASHTU:

• Rriten rastet ditore me COVID-19 në Shqipëri, autoritetet shëndetësore apelojnë për vigjilencë