Kualifikueset e Kupës së Botës, Hysaj e Laçi analizojnë Serbinë: Luajmë për kombin

Kombëtarja shqiptare vijon në Tiranë përgatitjet në prag të dy ndeshjeve të radhës kualifikuese drejt Botërorit, ndaj Serbisë në shtëpi dhe Letonisë në transfertë. Ajo që konsiderohet më e rëndësishmja për shumë arsye është e para, më 7 qershor, një duel ballkanik që një dekadë më parë tregoi se nuk luhet vetëm futboll.

Këtë të hënë, sfida në fjalë u analizua nga dyshja Hysaj-Laçi, me shkodranin që asokohe luante si titullar në të dyja duelet.

“Të gjithë e kanë parë ndeshjen që kemi luajtur ne atje. Nuk është imazh i bukur për futbollin. Nuk duhet të ndodhë ashtu si në atë kohë. Është ndeshje shumë e rëndësishme, luajmë për shtetin, tifozët, kombin. Nëse ne fitojmë, mund të jetë krenari e madhe për ne. Duhet të jemi edhe të qetë që ta kuptojmë, duhet të mendojmë se jemi futbollistë, këtu për të kënaqur tifozët dhe për të fituar”, tha Hysaj.

Më tej, mbrojtësi foli edhe për atmosferën në ekip: “Të gjithë futbollistët janë të përqendruar. E dinë mirë që kjo është një ndeshje shumë e rëndësishme, si për ne, ashtu edhe jashtë futbollit. Ka shumë tifozë që po e presin me padurim këtë ndeshje. Normalisht që kam folur me disa lojtarë për lidhjet tona që kemi pasur, edhe për ndeshjet e kaluara që kemi luajtur bashkë.”

Më tej, mesfushori Qazim Laçi foli edhe për duelin me Letoninë: “Për mendimin tim, nuk kemi pasur asnjëherë ndeshje të lehtë. Duhet të kemi gjithmonë në mendje që kemi dy ndeshje edhe atë me Letoninë. Një fitore ndaj Serbisë duhet të pasohet nga një tjetër në Letoni dhe do të jetë aq më mirë për të gjithë.”

Grupi është thuajse i plotë në Tiranë, ndërsa i vetmi futbollist që ende nuk ka mbërritur është Jasir Asani.

LEXONI GJITHASHTU:

• Southampton interesohet për Brojën, sezonin e ri luan në Championship
• Mbyllet Kampionati Evropian U-17 në Shqipëri, Portugalia shpallet kampione