Kuba fillon lirimin e të burgosurve pasi SHBA do heqë përcaktimin e terrorizmit

Kuba ka liruar më shumë se 12 të burgosur politikë menjëherë pasi presidenti në largim i SHBA Joe Biden njoftoi se po e hiqte vendin nga lista e shteteve sponsorizuese të terrorizmit të Uashingtonit.

Të burgosurit u liruan nga burgjet kubane të mërkurën, sipas grupeve civile në ishull. Observatori Kuban i të Drejtave të Njeriut tha se 18 persona ishin liruar deri në orën 16:00 EST.

Disa ishin arrestuar në vitin 2021 gjatë demonstratave më të mëdha antiqeveritare që janë parë në Kubë për disa dekada.

Reyna Yacnara Barreto Batista, një artiste tatuazhesh 24-vjeçare e cila u dënua me katër vjet burg për përfshirjen e saj në protestat e vitit 2021, ishte në mesin e të liruarve të mërkurën. “Unë jam në shtëpi me nënën time,” tha ajo. “E gjithë familja po feston.”

Njoftimet erdhën një ditë pasi Biden tha se ai do t’i jepte fund cilësimit të Kubës për terrorizëm, një veprim i negociuar me ndihmën e Kishës Katolike dhe i mirëpritur nga autoritetet në Havana, por që mund të anulohet ende nga Donald Trump pas inaugurimit të tij më 20 janar.

Megjithëse zyrtarët amerikanë treguan se marrëveshja kishte për qëllim gjithmonë lirimin e të burgosurve politikë, Kuba ka shmangur të konfirmojë se ekziston një lidhje.

Disa orë pas njoftimit të Biden të martën, Ministria e Jashtme Kubane tha se do të lironte “gradualisht” 553 të dënuar.