Kulla e Inglezit drejt degradimit, familjet pronare ofrohen për rindërtimin

Kulla e Inglizit, monument i kategorisë së parë, nga dita në ditë po shkon drejt degradimit.

Kulla në fjalë ka pasur 28 bashkëpronarë, ndërsa sot numëron shumë më shumë. Pjesa dërrmuese e tyre jetojnë jashtë vendit, gjë që ka vështirësuar ndërhyrjen në këtë objekt.

Adnan Ulqinaku dhe Abdullah Çoba janë 2 anëtarë të familjeve që zotërojnë pronën. Ata kërkojnë nga institucionet që të marrin masa për të ndërhyrë pasi është e shqetësuese për ta, gjendja në të cilën ndodhet kjo kullë.

“Është për të ardhur keq. Degradimet vazhduan dhe kaq sa është sot, kati i dytë është për të ardhur keq,” – tha Ulqinaku.

“Nëse rregullohet dhe vendoset që të bëhet diçka për së mbari nuk është vetëm e jona, ose e familjes tonë, është edhe e Shkodrës, e turistëve që vijnë këtu për ditë,” – u shpreh Çoba.

Ulqinaku dhe Çoba janë të gatshëm për të bashkëpunuar si në përballimin e shpenzimeve, po ashtu edhe në marrëveshjet me drejtorinë e kulturës dhe trashëgimisë kulturore.

Ndërkohë, dekoracionet e shënimet historike mbi këtë kullë po humbasin gjurmët. Kulla dokumenton një pjesë nga historia e pavarësisë së Shqipërisë. Ndërtesa është ngritur në shekullin e 19-të dhe është një dëshmi e periudhës së aristokracisë mesjetare në Shkodër.

LEXONI GJITHASHTU:

• Lufta në Izrael, paralajmëron Kulla: Mesdheu në javët e ardhshme do jetë i trazuar
• Kulla: Kurti luajti blofin, as ai nuk do firmoste me Ana Brnabiç