Kullat e Tiranës, pamje me dron të ndërtimeve në qendër dhe bulevard

Në qendrën e Tiranës kullat duket sikur janë vënë në garë se kush shkon më lart drejt qiellit.

Pamjet e filmuara me dron nga Euronews Albania tregojnë një panoramë më të qartë të ndërtimeve të mbyllura, kantiereve të hapura me vinçat mbi to.

Kullave që aktualisht kanë përfunduar, ose janë në proces ndërtimi do t’u shtohet edhe një kullë tjetër pas lulishtes së Pallatit të Kulturës, “Tirana Multifunctional Center”, projekt i një zyre arkitekturore daneze.

Nga pamjet shihet se pas qendrës zonat më të preferuara janë dy kahet e bulevardit qendror të kryeqytetit.

Bulevardi është zgjatur deri te Lumi i Tiranës, ku është një tjetër projekt kullash, ai i arkitektit italian, Stefano Boeri.

Në gjatësinë nga ish-Stacioni i Trenit deri te lumi, dy anët e tij janë bosh, ose me shtëpi përdhese. Këto pamje mund të mos jenë për shumë gjatë.

Themelet e disa projekteve të miratuara tashmë kanë nisur dhe shpejt kullat do të lartësohen edhe në këtë zonë.

LEXONI GJITHASHTU:

• ‘Syri’ mbi sheshin ‘Skënderbej’, dy kate pa leje te ‘Eyes of Tirana’
• Më shumë kulla? Cila është kostoja në cilësinë e jetesës së ndërtimeve në Tiranë