Kur do të arrihet armëpushimi me Rusinë? Ambasadori ukrainas flet në Euronews

Armëpushimi mes Ukrainës dhe Rusisë pritet të arrihet në pranverë ose verën e këtij viti.

I ftuar në Euronews Albania, ambasadori i Ukrainës në Shqipëri, Volodymyr Shukrov u shpreh se po punohet në mënyrë aktive që të krijohen kushtet për të vendosur paqen.

“Përfaqësuesit, lojtarët me ndikim ndërkombëtar që po punojnë në një mënyrë aktive në drejtim të krijimit të kushteve për të vendosur paqen, këtu kemi përmendur edhe Kinën, e cila po vazhdon të marrë një rol, por nga ana tjetër janë përpjekjet e Francës, Turqisë dhe Kombeve të Bashkuara.

Unë shpresoj se të gjitha këto përpjekje do të marrin një ditë rezultatet e duhura. Nëse do të kemi parasysh ndihmën nga partnerët tanë në kohën e nevojshme, mendoj që paqja mund të gjendet në pranverë apo në verën e këtij viti”, theksoi ai.

Kur u pyet dhe në lidhje me kërcënimet bërthamore që vijnë nga Rusia ambasadori u përgjigj: “Nëse ne po flasim për gjendjen psikologjike të lidershipit rus, çdo gjë mund të jetë e pritshme. Nëse flasim për të dhëna objektive, nuk ka arsye objektive për të përdorur armë bërthamore nga Rusia”.

Në Shqipëri 443 ukrainas kanë kërkuar ndihmë që të mbrohen nga lufta. Ata kanë nisur jetën normale në disa qytete të vendit.

Kur lufta vijon Kievi ka ende nevojë për mbështetje, sipas ambasadorit duhen më shumë armë, avionë luftarake që të mbrojnë qiellin e Ukrainës.